Zuiako Udalak "irmotasunez" gaitzetsi du Elena Loyo korrikalariak salatutako eraso matxista. Murgian korrika egiten ari zela, kotxe batek jarraitu zuela salatu zuen Loyok sare sozialetan; SEAT Leon urdin batean jarraitu zion gizonaren datuak eman zituen. "Ozta-ozta alde egin eta leku seguruan jartzea lortu dut, baina kezkatzen nau gizon horrek beste emakume bati berdina egitea, asmo onik ez zuela uste dudalako", salatu zuen.
"Elena Loyo auzokideari eta haren inguruari laguntza osoa eskaini nahi diogu, eta jakitera eman nahi diogu gertu izango gaituela eta bere esku jarriko ditugula behar dituen baliabideak", adierazi du Udalak ohar batean. "Zuiako Udalak konpromisoa hartzen du lan egiten jarraitzeko eta laguntza eskaintzeko, bere eskumenak betez, indarkeria matxistarik gabeko bizitzak bermatzeko".