Pasa den igande goizean, Otxandioko plazatik irten zen martxa, eta eguerdi aldera iritsi zen Legutiora; hainbat ikuskizun izan ziren bertan; tartean, Turukutupa konpainiaren Rezikletas izeneko emanaldia.
Zortzigarren etapa Legutiotik irtengo da igandean, hilak 15; eta Leintz Gatzagan amaitu. Ibilaldian zehar, Panta Rhei Teatroak Bideart ikuskizuna eskainiko du Landan; eta Gatzagan, gatz museoa bisitatu ahalko da, eta tailerrak egin. Ostiralean, maiatzak 13, amaitzen da izen-ematea, 20:00etan. Aseguru eta autobusaren kostua zazpi eurokoa da.
Zazpi hilabetez
Donostia 2016, Europako Kultur Hiriburuaren muga-gaindiko proiektua da; izan ere, zazpi hilabetez Euskal Herri osoa zeharkatuko baitu ibilbideak, Donostia 2016ren filosofia zabalduz. Martxoaren 27an hasi zen, eta orain arteko parte-hartzeak espektatiba guztiak bete dituela jakinarazi dute antolatzaileek. Ibilian egiten da kultura lelopean, herritarren interesa piztu du egitasmoak mendizaletasuna eta kultura bezalako disziplinak uztartuz; orain arte 500 lagun baino gehiagok hartu dute parte ekimenean.