Poliziak 29 urteko gizon bat atxilotu du igande arratsaldean, bikotekide ohiari lesioak eragitea eta mehatxuak egitea egotzita.
Gertakariak Gasteizko Armentiako taberna batean hasi ziren, bertan eztabaida bat izan zuten gizonak eta emakumezkoak. Poliziaren arabera, gizonak jarrera oldarkorra hartu zuen, irainak egin zizkion eta labana batekin mehatxu egin zion emakumeari, eta emakumeak ohartarazi zion Poliziari deituko ziola bere jokabidearekin jarraituz gero.
Ondoren, eztabaidak aurrera jarraitu zuen gizonaren etxebizitzara autoz joan ziren bitartean. Udaltzaingoaren arabera, emakumeak markak zituen beso batean. Gizonak alde egin zuen agenteak iritsi zirenean, baina Zaramaga auzoan aurkitu eta atxilotu zuten.
Halaber, 23 urteko gizon bat ere atxilotu zuten. Hiru adingaberengandik urruntzeko agindua zuen gizonak. Haietako batek hurbil ikusi zuen gizona Independentzia kaletik zebilela, eta neskak Poliziari hots egin zion. Udaltzainek gizona identifikatu eta atxilo eraman zuten, urruntze agindua urratzea egotzita.