Gasteizko udalbatzak bost mende baino gehiagoko tradizioari eutsi dio goiz-goizetik, udalerria inguratzen duten mugarriei bisita eginez; aurten zazpi kilometroko ibilbidea osatu dute Gasteizko mendatearen eta Zaldiaranen artean. Ohiko ibilaldiaren ondoren, Olarizuko zelaietan jarraitu du festak. Bertan, beroa ez da oztopo izan, eta ilara luzeak izan dira Boilur elkarteak prestatutako babarrun plater bat lortzeko.
Arratsaldean, erromeriak adin guztientzako egitarau zabalarekin jarraitu du zelaietan. Beroak bero, gasteiztar ugari bildu dira herri kirolen erakustaldiaz gozatzera, baita euskal dantzekin eta haurrentzako jolasekin ere. Udal Musika Bandak, txistulariek, gaiteroek eta erraldoi zein buruhandien konpartsak lagunduta, kalejiran bueltatu dira herritarrak Gasteiz erdigunera, 20:00etan, eta Plaza Berrian jaialdiari amaiera eman diote zezensuzkoarekin.
Argazkiak: Ekaitz Anda