Suhiltzaileek lanean jarraitzen dute Gasteizko Gardelegiko zabortegian astelehen arratsaldean piztutako sutea itzaltzeko. Lana "zaila" izaten ari dela esan dute udal iturriek, eta suhiltzaileak bertaratu zirenetik, gau osoan zehar aritu dira lanean.
Zailtasun nagusietako bat da erretzen ari den materialak eragindako fokoak erresistentzia handia duela. Gainera, zabortegian ez dago hidranterik (ur hartunerik); ondorioz, suhiltzaileak ur gehiagoren bila joan behar dira behin eta berriz.
Astelehen arratsaldean materia organikoa pilatzen den eremu batean hasi zen sutea.
Udalak adierazi du kea ez dela arriskutsua herritarrentzat. Gauean zehar hirian erre usaina nabaritu dela eta, azaldu dute prozesu hori nahiko normala dela tenperatura jaisten denean eta haize-aldaketak daudenean. Nolanahi ere, zabortegiko suteak sortutako kea ez dela arriskutsua azpimarratu dute udaleko arduradunek.