MugiBike zerbitzu publikoak sendotzen jarraitzen du Gasteizen, eta lehen sei hilabeteetan 15.186 bidaia erregistratu dira. Guztira, erabiltzaileek 64.000 kilometro baino gehiago egin dituzte bizikleta elektrikoetan, eta 6.000 erabilera ordu inguru pilatu dira. Sareak 80 bizikleta ditu hiriko hainbat puntutan banatuta, eta eguneroko erabilerak 180 joan-etorri ingurura iritsi dira. Gainera, udaletik adierazi dutenez, sistemak 4,2 tona CO2 isurtzea saihestu du, auto batek 25.000 kilometro egitean sortzen duen kutsaduraren parekoa.
Beatriz Artolazabal alkateordeak datuen bilakaera "oso positiboa" izan dela nabarmendu du. Zerbitzua martxan jarri zenetik, erabilerak etengabe egin du gora; urtarrileko 1.474 bidaietatik maiatzeko 3.677ra igaro da, %150eko hazkundea sei hilabetean. Kilometro kopuruak eta erabilera orduek ere antzeko gorakada izan dute, eta bizikleta bakoitzaren txandakatzeak ia hirukoiztu egin dira. Ekainaren 7an, gainera, zerbitzuak bere errekorra hautsi zuen, bizikleta bakoitzak lau erabilera izan zituen, batez beste.
Artolazabalen hitzetan, MugiBike pasa da "jakin-mina pizten duen berritasun bat izatetik, hiriko eguneroko mugikortasunaren elementu garrantzitsu bihurtzera". Zerbitzuak eskaintzen duen malgutasunak eta erabilerraztasunak herritarren ohituretan eragin zuzena izan dutela azpimarratu du.
Erabiltzaileen artean egindako inkestek ere aldaketa esanguratsuak erakusten dituzte. Lau erabiltzailetik batek aitortu du MugiBike martxan jarri aurretik ia ez zuela bizikleta erabiltzen, eta ia laurden batek adierazi du zerbitzua ez balego autoz egingo lituzkeela joan-etorri horiek. Hamarretik zazpik, berriz, argi dute sistemak autoaren erabilera gutxitzen laguntzen diela. Artolazabalen arabera, "datu hauek erakusten dute ohitura berrien eta mugikortasun jasangarriago baten aldeko joera sendotzen ari dela".