Euskal Sagardoak TOPA! Gasteiz jaia antolatu du ekainaren 6rako. Euskal Herriko hamabi sagardotegitako sagardoa dastatzeko aukera izango da Gasteizko Aihotz plazan, eta musika emanaldiak, kontzertua eta dastatze gidatu azkarrak ere izango dira eguna girotzeko. Aurreko urteko egitarauaren ildotik, Aihotz plaza izango da berriz ere euskal sagardoaren topaleku nagusia Gasteizen.
Goizean 11:00etatik 15:30era eta arratsaldez 17:00etatik 21:00etara egongo da zabalik sagardo dastaketa. Bertaratzen direnek Euskal Herriko hainbat txokotako sagardoa probatu ahal izango dute, bertako jatekoarekin lagunduta.
Guztira, hamabi sagardotegik hartuko dute parte: Altuna (Urnieta), Axpe (Markina-Xemein), Etxeberria, Gurutzeta, Petritegi eta Zapiain (Astigarraga), Iturrieta (Aramaio), Izeta (Aia), Kuartango (Zuhatzu Kuartango), Oiharte (Zerain), Trebiñu (Trebiñu) eta Zelaia (Hernani).
Sagardoa dastatzeaz gain, dastatze gidatu azkarrak ere antolatu dituzte egunean zehar: 12:00etan, 13:00etan, 14:00etan, 17:30ean eta 18:30ean. Musikak ere izango du lekua egitarauan: 12:30ean musika emanaldia izango da, eta 18:30ean DJ Malandrok kontzertua eskainiko du.
Egun osoko giro herrikoia osatzeko, antolatzaileek iragarri dute bertako jatekoa ere izango dela Gasteizko Aihotz plazan.