Espainiako Aldizkari Ofizialak (BOE) gaur argitaratu ditu Arabako erreferentzia indizeak, Gasteizko Udalak alokairuen prezioei mugak jartzeko beharrezkoak dituen datuak, alegia. Izan ere, herrialdean tentsio handiko eremu izendatu duten udalerri bakarra da hiriburua, eta iragan urriaren amaieran eremu tentsionatua izendatzea erabaki zen.
Indize berri hori aplikatuta, gaurtik aurrera prezio tarte bat aplikatuko zaie jabe handiei (bost higiezin edo gehiago dituztenei), lehen aldiz alokairuan jartzen diren etxebizitzei eta azken bost urteetan alokatu ez direnei. Gasteizen 129 jabe handik 884 etxebizitza kudeatzen dituzte.
Gaurtik aurrera, beraz, Arabako datuak jasota daude Espainiako etxebizitzaren alokairuaren erreferentzia prezioen sisteman (Serpavi). Alokairuaren prezioen tarteak jakiteko, katastroaren erreferentzia edo etxebizitzaren helbide osoa jarri behar da. Gehienezko eta gutxieneko errentak ezartzeko, sistemak kontuan hartzen ditu honako hauek ere: energia ziurtagiria, eta etxebizitza zein solairutan eta nola dagoen ere.
Indizeak kontratuen %10i baino ez die eragiten. Gasteizko datuen arabera, alokairuak hilean 624 eta 813 euro bitartekoak dira, eta preziorik ohikoena 721 eurokoa da.