Berri agentziek zabaldu dutenez, 21 urteko gizon bat atxilotu dute Gasteizen, Arabako Foru Aldundiaren tutoretzapeko 17 urteko neska bati sexu erasoa egitea egotzita. Eusko Jaurlaritzaren Segurtasun saileko iturriek baieztatu dutenez, atxiloketa apirilaren 9an izan zen, erasoa gertatu eta lau egunera. Ondoren, gizonezkoa epailearen esku utzi zuten.
Aldundiak azaldu duenez, tutoretzapeko adingabeak salaketa jarri zuen Ertzaintzaren aurrean, hezitzaileetako bati gertatutakoa kontatu ondoren. Biktimak atxilotutako gizonarekin sexu harremanak izateari uko egin zion, eta orduan egin zion mutilak sexu erasoa. Joan den igandean, apirilaren 5ean, lagun batekin aisialdian zegoela ezagutu zuen mutila.
Gertatutakoa kontatu ondoren, neskari osasun zentro batera laguntzeko protokoloak aktibatu ziren, eta ustezko erasotzailearen aurkako salaketa jarri zuten.
Arabako Foru Aldundiak irmo gaitzetsi du erasoa, eta gertutasuna eta elkartasuna adierazi die gazteari, haren familiari eta hurbilekoei.