Zabaliburu liburu eta irakurketa jaialdiak Elena Odriozola ilustratzaileari emango dio sari nagusia. Aitortza honen bidez, antolatzaileek donostiarrak nazioartean egin duen ibilbide luze eta oparoa nabarmendu nahi dute. Saria bera ere artelana izango da: Leire Garcia-Fanguito zeramikariak, Blas Arratibel artisautza lehiaketako irabazleak, edizio honetarako sortutako eskultura berezia.
Aurtengo jaialdia, bosgarrena, apirilaren 13tik 23ra bitartean ospatuko da Zabalganean, Irakurmindu zaitez lelopean. Odriozolaren saria banatzeaz gain, programazio osoak "liburuekiko maitasuna" izango du ardatz, irakurzaletasuna sustatzeko eta hiriko zein kanpoko sortzaileak auzora hurbiltzeko. Sonia Diaz de Corcuera Kultura zinegotziak azpimarratu duenez, ekimen honek funtsezko papera betetzen du liburuaren sektoreari laguntzeko eta kultur partaidetza indartzeko.
Programazioaren antolaketan, auzoaren inplikazioa nabarmendu du zinegotziak. Ikastetxeek, institutuak eta Zabaliburu kolektiboak elkarlanean jardun dute irakurketa maratoiak, olerki-xuxurlatzaileak eta erakusketak antolatzeko. Gainera, Karmele Jaio idazleak eta Helena Azkarraugarizar artistak ere parte hartuko dute, azken honek jaialdiko irudia diseinatu eta ilustrazio tailer bat eskainiz.
Jaialdiaren ekitaldi nagusietako bat apirilaren 18an izango da, gizarte etxearen kanpoaldean egingo den liburu azokarekin. Goiz osoan zehar, bost liburu dendak eta hainbat argitaletxek beren produktuak erakutsiko dituzte, eta lehen aldiz, autoargitalpenentzako tarte berezi bat egongo da.