Osasun Publikoa Aurrera plataformak iragarri du borrokan jarraituko duela Gasteizko bi EAGak "365 egun eta langile guztiekin izan arte" eta Santiago ospitaleko larrialdietan baliabide guztiak izan arte, "hiritarron bizitzak arriskuan ez jartzeko". Astero egiten duten bezala kontzentrazioa egin dute ostegun honetan ere Olagibeleko osasun etxearen aurrean.
Plataformaren irudikoz Gasteizen EAG bat soilik dago, "San Martinekoak asteburuetan bakarrik funtzionatzen duelako". Larrialdiei dagokienez, salatu dute urteak igaro direla Santiago ospitalea "bururik gabe utzi zutenetik", zerbitzu mediko gehienak eta kirurgiko guztiak Txagorritxun daudelako eta zainketa intentsiboetako unitaterik ez dagoelako. "Hemen artatzen den larrialdi larri bakarra psikiatrikoa da", azpimarratu dute.
"Okerrena da Osakidetzak ezkutatu egiten diela egoera herritarrei dena ondo doala saltzeko, eta informazio falta hilgarria izan daitekeela", esan dute.