Gasteizko Udaltzaingoak 54 urteko emakume bat atxilotu du, gizonezko bikotekideari eraso egiteaz akusatuta. Atzo gaueko bederatziak aldera gertatu zen ustezko erasoa, Pilar auzoko Honduras kalean bikotean izandako eztabaida baten ondoren.
Abisua jaso ondoren gertakarien lekura joan ziren udaltzainak, eta ikusi zuten gizon batek zauriak zituela aurpegian. Honek bere bikotekideak harramazkatu egin ziola esan zien agenteei, eta ondoren alde egin zuela. Inguruan zegoen testigu batek berretsi zuen gizonezkoaren bertsioa. Emakumea aurkitu zutenean, gertatutakoa aitortu zuen, eta, hortaz, eraso egiteagatik atxilo eraman zuten, etxeko indarkeriaren testuinguruan.