Gasteizko Udalak gaur onartu du euskararen erabilera sustatzeko dirulaguntzen kreditua handitzea. 30.000 euro gehiago bideratuko dituzte proiektu hauetara, 199.000 euro guztira. Erabaki honekin, aurreko ekitaldian baino 103.000 euro gehiago bideratuko dira erabilera sustatzera.
Zehazki, guraso elkarteen eta guraso elkarteen federazioek antolatutako ekintzetarako laguntzetan igo dute kopurua. Kategoria honetarako 89.000 euro egongo dira eskuragai. "Aurrekontua handituta, guraso elkarteen inplikazioa aitortu eta babestu nahi dugu, balio handiko proposamenak aurkeztu baitituzte euskara txikienei haien egunerokoan hurbiltzeko" adierazi du Maria Nanclares Euskara zinegotziak.
Guraso elkarteen lerroaz gain, beste hiru lerro ere baditu dirulaguntza deialdiak. Kirolean, aisialdian eta denbora librean euskararen erabilera sustatzeko 65.000 euro bideratuko dira. Bestalde, lan osoa edo zati bat euskaraz egiten duten Gasteizko hedabideentzako 30.000 euro eskainiko dituzte, eta azkenik, 15.000 euro bideratuko dituzte euskarazko kultur jarduerak sustatzeko Euskararen Nazioarteko Egunaren harira, azaroaren 1etik abenduaren 17ra bitartean.