Judimendiko auzo elkarteak salatu du azken urteetan auzoak pairatzen duen bide segurtasun falta, eta Gasteizko Udalari neurriak hartzeko eskatu dio. Elkartearen arabera, auzoan hainbat "puntu beltz" daude, eta horietan harrapatzeak gertatu dira azken urteetan.
Elkarteak azaldu duenez, azken istripua irailaren 10ean gertatu zen, Jose Mardones kalea zeharkatzen duen zebrabidean, Benito Ginea kalearen parean. Hiru lagun zauritu ziren. Aurretik ere, ekainean eta iazko abenduan, beste bi harrapatze gertatu ziren Olagibel kalea eta Judimendi etorbidea elkartzen dituen bihurgunean; azken horretan, pertsona bat hil zen.
Auzo elkarteak gogorarazi du ez direla kasu isolatuak eta udalak badakiela arriskutsuak direla gune horiek. Hala ere, salatu dutenez, orain arte ez dira hartu beharrezko neurriak. "Beharrezkoa da premiazko neurriak hartzea eta auzoko kaleen segurtasuna berrikustea, istripu tragiko gehiago saihesteko”, adierazi dute Judimendikoak elkarteko ordezkariek.