Judimendiko bizilagunek elkarretaratzea egin dute astearte arratsaldean auzoko bizilagunentzat Bizan "duina" eskatzeko. Salatu dute auzoak 33 urte daramatzala aldarrikapen horri eusten, eta udalaren aldetik ez dutela inolako erantzun positiborik jaso. Are gehiago, azpimarratu dute Maider Etxebarria alkateak ez duela bizilagunekin bildu nahi.
Gaur egungo zentroko erabiltzaileek eta Judimendikoak auzo elkarteak deitutako protestan gogoratu dute 2022an, Gorka Urtaran alkate eta Jon Armentia Gizarte Politiketako zinegotzi zela, Udalbatzak aho batez onartu zuela Bizan Judimendi lehenbailehen birkokatzea.
Era berean, gogoratu dute Maider Etxebarria gaurko alkateak hauteskunde kanpainan esan zuela Bizan Judimendi bere lehentasunetako bat zela. "Hala ere, auzoak Bizan duinik gabe jarraitzen du, eta, gainera, gizarte etxerik gabe aspaldidanik", azpimarratu dute.