Joan den ostiralean zaleen omenaldia jaso zuen Mendizorrotza kiroldegian, larunbatean Buesa Arenan egon zen Baskoniaren eta Bilbao Basketen arteko partida ikusten, eta gaur Gasteizko Udalak egin dio harrera Essie Hollis saskibaloi jokalariari.
Kiroleros saioaren eskutik, jokalari historikoari omenaldia egin nahi izan diote zaleek; 1983 eta 1985 urteen artean Baskonian superbeltza ezizenez ezagun egin zen, eta 1985ean Copa Asociacion izenekoa irabazi zuen. Garaipen horrek Europako saskibaloiaren ateak ireki zizkion Gasteizko taldeari.
Egunotan egindako ekitaldietan jokalariaren balentriak ekarri dituzte gogora. Besteak beste, taldean kide izan zuen Iñaki Garaialdek parte hartu du omenaldiotan.