Espainiar Estatuko azpiegitura agrovoltaiko handiena inauguratu dute gaur Arkautiko Neiker institutuan, Nekazaritza Ikerketa eta Garapenerako Euskal Erakundean. Lursail berean jarriko dituzte, batetik, letxugak eta patatak, eta gainean panel fotovoltaikoak. Proiektu "esperimental eta berritzailea" da, energia ekoizpena eta nekazaritza bateragarriak ote diren aztertzeko.
4.000 metro koadrotan banatuta 212 modulu fotovoltaiko jarri dituzte, eta horien azpiko baratzearen egokitzapena eta jasangarritasuna ebaluatuko dituzte. 163.914 kWh sortuko dituzte aipatutako plakek, 50 etxebizitzen batez-besteko kontsumoa, eta Arkautiko campuseko autokontsumorako erabiliko dute.
Eguzki plaken alboan 4.000 metro karratuko beste lursail bat landuko dute, nekazaritza erabilerarako soilik, plakarik gabe, kontrol eremu gisa, bien errendimenduaren arteko aldea zehatzago neurtu ahal izateko. Proiektuak trantsizio energetikoan aurrera egiteko balioko duela nabarmendu du Amaia Barredo Elikadura, Landa Garapen eta Nekazaritza sailburuak.