Hezkuntza publikoko irakasleek gaua eman dute Eusko Jaurlaritza parean, kanpaldian, eta bertan jarraituko dutela iragarri dute. Grebaren protestetara batu dira goizaldean, baina gaur gauean ere Jaurlaritzaren aurrean egongo dira. 19:00etan jendea kanpaldira batzeko deia zabaldu dute.
Bart gauean poliziak bertaratu ziren, eta kanpaldian zeuden irakasleetako batzuk identifikatu zituzten. Hala ere, bertan jarraitu zuten, "lan baldintza duinen defentsan" Hezkuntza sailari presioa egiteko.
Joan den astean hiru egunetan greba egin ostean, gaurko eta biharko ere deitu dituzte lanuzteak eskola publikoetako irakasleek, Steilas, LAB, ELA eta CCOO sindikatuen ekimenez. Jaurlaritzak, hain justu, negoziazioak eten izanaren ardura egotzi die greben deitzaileei, negoziazio mahaia berriro antolatzea "oztopatu" dutela leporatuz.
Hala, greba bezperan, irakasle talde batek kanpaldia hasi du Eusko Jaurlaritzaren Gasteizko egoitzaren aurrean, eta Hezkuntza sailari negoziazio mahaia berriz biltzea eskatu. "Gure lan baldintzak hobetzeko eskubidea dugu, eta borroka zilegi da", gogoratu dute elkartu diren irakasleek. "Gobernuak proposamen sendo bat egin ezean, asteartean eta asteazkenean berriro ere kaleak beteko ditugu".
Jaurlaritza parean bildutako irakasleen aldarrikapenak gehiengo sindikalaren aldarrikapenak direla nabarmendu dute. "Eskola publikoak baliabideak behar ditu, lan zama arintzeko neurriak, enplegua egonkortu eta ordezkoen lan baldintzak hobetzeko planak, besteak beste".
