Ertzaintzak hiru pertsona atxilotu ditu igande goizean Gasteizen, agintaritzaren agenteen aurkako atentatu delituak egotzita. Segurtasun Sailak zabaldutako informazioaren arabera, eguerdiko hamabiak eta laurden aldera, Ertzaintzari jakinarazi diote lagun talde bat Zaramagan "kristalezko botilekin eta harriekin borrokan" ari zela, eta poliziak iritsi direnean pertsona batzuek era guztietako objektuak jaurti dizkietela: ertzainei aurre egin eta "kristalezko botila hautsiekin eraso" egin diete.
Liskarraren ondorioz, bi gaztek eta sei ertzainek osasun laguntza behar izan dute. Gazteetako bat Txagorritxuko ospitalera eraman dute. Sei ertzainek, berriz, osasun zentro batera joan behar izan dute, hainbat kolpe eta ebakiren ondorioz. Atxilotuak 31 urteko emakume bat eta 22 eta 23 urteko bi gizon dira.
Ertzaintzak dio inguruko ostalaritza lokal baten inguruan bi taldeetako kideen arteko eztabaida batek eragin zuela liskarra.
Bestetik, ostegunean Koroatze auzoan izandako beste borroka baten ondoren, gaur PSE, EAJ eta PP alderdiek "irmoki gaitzetsi" dituzte udaltzainek "beren zereginak betetzen ari zirela jasandako erasoak".