Tuvisako autobusek semaforoetan lehentasuna izateko proiektu pilotuak arrakasta izan duela jakinarazi du Gasteizko Udalak. Ibilbideko puntu kritikoetan "zirkulazioa arindu eta denborak hobetzea" lortu dute ezarritako sistema berriarekin, udalak adierazi duenez.
Sei hilabetez frogatu dute proiektu pilotua Tuvisako 5. linearen zati batean, Martxoaren 8a hiribidea eta Salburuko bulebarraren artean, eta eraginkorra dela ikusi dute. Azaldu dutenez, erabilitako teknologia "erabat eskalagarria" da, eta etorkizunean inplementatzeko bidea erraztuko du horrek.
BEI ez beste autobusetarako
BEI autobusek badute beren sistema propioa bidean lehentasuna izateko, galtzadan jarritako espira magnetiko batzuen bidezkoa. Aldiz, gainerako autobusetarako irrati frekuentzia bidezko sistema da frogatu dutena. Teknologia honek kontua hartzen du autobusak berez zein ordutan igaro behar zuen leku bakoitzetik, eta noiz ari den igarotzen. Hala, atzeratua doala igarri dezake, eta semaforoak berde jarri autobusari lehentasuna emateko.
BEIaren sistemaren aldean, irrati frekuentzia bidezko sistema honen ezarpena errazagoa da, jakinarazi dutenez, eta mantenu lanek ere kostu txikiagoa dute. Izaskun Reyes Tuvisako presidenteak adierazi du proiektu pilotu hau "flota zein instalazioak modernizatzeko apustuaren beste adibide bat" dela. Bide horretan urratsak ematen jarraitzea espero dutela iragarri du.