Eusko Legebiltzarrean idatzizko galdera bat erregistratu berri du Rebeka Ubera EH Bilduko legebiltzarkideak. Arabako anbulantzia psikiatrikoa non dagoen jakin nahi du.
Osakidetzak anbulantziak kontratatzeko pleguan Arabak izan behar duen anbulantzia psikiatrikoa jasotzen da, baina ez dela erabiltzen ari azaldu du Uberak; eta, are gehiago, ez dagoela pertsonal zehatzik anbulantzia horretarako. "Ez dakigu base batean aparkatuta aurkitzen den edota behin baldintza teknikoetan aurkeztu ostean, ez den jarri".
EH Bilduko legebiltzarkideak galderan jaso duenez, anbulantzia psikiatrikoaren ordez, "Oinarrizko Bizi Euskarri bat erabiltzen omen da denetarako, baita psikiatrikorako ere"; eta horren harira galdetu du ea Osasun sailak neurririk hartuko duen egoera zuzentzeko, eta, hala izatekotan, zer neurri.
Anbulantzia psikiatrikoaren beharra azpimarratzeko, Uberak gogoratu du Covid-19aren pandemia ostetik larrialdi psikiatrikoak %200 igo direla Araban. "Hori da larrialdietan ari diren langileek esaten digutena", adierazi du.