Lurpeko Kaierak izeneko fanzinoteka proiektu autogestionatua aurkeztuko dute jendaurrean ostiral honetan, martxoaren 21ean. 19:00etan izango da ekitaldia, Gasteizen, Eva Forest Liburutopian. Fanzineak gordetzea eta zabaltzea du helburu fanzinotekak, "beti modu herrikoian eta irisgarrian".
Baina ez edozein fanzine. "Fanzine disidentez" betetako ia 400 fanzineko bilduma ondu dute jadanik, kapitalismo heteropatriarkalaren botereekiko desafekzioa erakustea irizpide gisa hartuta. Azpikulturak, musika, politika, literatura eta abar luzea dute hizpide, antolatzaileen esanetan.
Bi tresna nagusi aurkeztuko dituzte fanzineak zabaltzeko, digitala eta fisikoa. Egoitza fisikoa Liburutopian izango du, eta fanzineak hartu eta irakurtzeko aukera eskainiko da bertan, liburutegi bat balitz bezala. Bestalde, lurpekokaierak.com webgunean ikusgai izango dira artxibatutako fanzine guztiak, azalak gutxienez. Euskaraz, katalanez eta gazteleraz ikusteko aukera izango da, Euskal Herria eta Kataluniaren arteko elkarlanetik sortu baita.
Iragarri dutenez, bestelako egitasmoak ere jarriko dituzte martxan fanzineak eta haiekin lotutako kulturak zabaltzeko, izan aurkezpenak, erakusketak edo mahainguruak.
Fanzineak irakurtzeko aukera eskainiko du Liburutopiak. Argazkia: Lurpeko Kaierak.