Euskal Herriko Unibertsitateak Gasteizko Ingeniaritza eskolan egin du, astelehen honetan, Emakumeen Nazioarteko Egunaren bueltako ekitaldi nagusia. Bertan, EHUko Berdintasuneko arduradun berriak, Maggie Bullenek, genero harremanak eraldatzea ezinbestekotzat jo du eta genero eraikuntza berria aldarrikatu du: "Emakumeok ez dugu gizonen ondoan, segurtasun espazio batean, berdintasun posizio bat izan nahi soilik; era guztietako pertsonen artean eraiki nahi dugu, non edozein generotako edo ezeinetako pertsona izatea egitura horren zimenduetan dagoen, eta non kontziente garen beste faktore batzuez, eraikinaren orekarako, parekidetasunerako, harmoniarako kontuan hartu behar ditugunak: dibertsitate funtzionala, arrazakeria, lehentasun eta identitate sexuala, adina, egoera sozioekonomikoa".
Sexu eta genero indarkeria gogoan, elkartasuna adierazi die ere Bullenek Palestinan, Ukrainian eta munduko beste hainbat herritan "muturreko indarkeriak jasaten dituzten emakumeei".
Berdintasun sariak
Halaber, genero sistema bitarraren eta hegemonikoen oinarriak astintzen laguntzen dituen EHUko komunitatearen lana goratzeko eguna izan da gaurkoa, "feminismotik eraiki eta eraikiko dugun unibertsitatea ospatzeko", Maggi Bullenek azaldu bezala.
Hala, orain dela hamarkada pasatxo EHUk sortu zituen Francisca de Aculodi, Maria Goyri eta Micaela Portilla sariak banatu dira, gradu eta master amaierako lanetan nahiz doktorego tesietan genero ikuspegia txertatzea bultzatzeko eta ezagutarazteko lanik onenei. Aurten hamaika lan saritu dira hiru kategorietan:
Gradu amaierako lanetarako Francisca de Aculodi XI. Sariak:
- Arteak eta Humanitateak: Maider Lumbreras Otamendi (euskaraz) eta Claudia Yurena Larrad (gaztelaniaz).
- Ingeniaritza eta Arkitektura: Ihartze Diaz Cueli (euskaraz) Maitane Gómez González (gaztelaniaz).
- Zientziak: Olaia Farto Juaristi (euskaraz).
- Gizarte Zientziak eta Zientzia Juridikoak: Ane Lapitz Kaltzada (euskaraz) eta Natalia Navas Gil (gaztelaniaz).
- Osasun Zientziak: Izaro Erzilla Etxegibel (euskaraz) eta Alma Ezquerro Hassenpflug (ingelesez).
Master amaierako lanetarako Maria Goyri XIII. Saria:
- Naia Irati Gambra Garcia.
Doktorego tesietarako Micaela Portilla Vitoria XII. Saria:
- Uzuri Albizu Mallea.
Omenduak
Lan akademikoak saritzeaz gainera, EHUren komunitateko kide diren sei emakume omendu dituzte Emakumeen Nazioarteko Eguneko ospakizunean, unibertsitatean eta gizartean egin duten ibilbideagatik. Horietako bost, hautagaitza bidez aukeratu dira; seigarrena, berriz, hautagaitza berezia izan da: Elena Leiñena, orain arteko Berdintasun zuzendari izandakoa.
Arteak eta Humanitateak atalean, Maria Jose Olaziregi Alustiza omendu dute; Gizarte Zientziak eta Zientzia Juridikoak atalean, berriz, Yolanda Jubeto Ruiz; Zientziak atalean, Maria Jesus Irabien Gulias; Gizarte Zientziak eta Zientzia Juridikoak sailean, Nahia Idoiaga Mondragon; eta TEKAZEL atalean, Susana Andino Garcia.
EHUren konpromisoa
Emakumeen Nazioarteko Egunaren harira, Arabako Campuseko errektoreorde Ixone Fernandez de Labastida Medinak, Unibertsitateen CRUE elkartearen manifestuarekin bat eginez adierazi du, "aukera berdintasunak sustatzeko eta emakumeak ahalduntzeko hezkuntzan eta ikerketan lan egiteko konpromisoa dugu Euskal Herriko Unibertsitatean, goi mailako hezkuntza ezin delako neutrala izan". Gogoratu duenez, zientzien adarretan ikasleen erdiak pasatxo (%54) emakumeak diren arren, ingeniaritza arloak guztiz maskulinizatuta segitzen du, "10etik 3 baino ez dira emakumeak eta arrakala hori gutxitzeko lanean ari gara".
EHUko idazkari nagusi Leire Garmendia Arrietak itxi du ekitaldia. Aurtengo leloa gogoratuz: Genero arrakalari, diskriminazioei eta erasoei, aurre. "Genero desberdintasuna ahalbidetzen duen egiturazko arazoa desmuntatu beharra" aldarrikatu du. Berdintasunean sakontzeaz gainera, dei egin du "pertsonen zaintza eta komunitatea sendotzea bermatzeko tresnak" eskuratzeko lan egiteko, "zientzia oinarri hartuta".