San Frantzisko Asis eliza Memoria Demokratiko Gunea izendatuko dute

Erredakzioa 2025ko mar. 3a, 14:05

Memoria Gunea datorren urtean zabaltzea aurreikusten dute. Argazkia: ALEA

BOEn argitaratu du Espainiako Gobernuak izendapenerako tramiteak hasi direla. Estatuak konpromisoa hartu du nazioartean zabaltzeko martxoaren 3ko sarraskia.

Martxan dago jadanik San Frantzisko Asis eliza Memoria Demokratiko Gune izendatzeko prozesua. Gaur goizean argitaratu da BOEn, Estatuko Aldizkari Ofizialean, baina izendapena ez da automatikoa. Beste elkarte batzuek eta tokiko erakundeek txosten batzuk sortu beharko dituzte izendapenaren harira, eta helegiteak aurkezteko epea ere egongo da. Behin fase hori amaituta egingo da izendapen ofiziala, eta plaka bat jarriko dute elizan, "memoria demokratikoaren gune" gisa identifikatzeko.

Martxoak 3 elkarteak kritika egin dio BOEko argitalpenari, 1976ko sarraskia "gertakari" gisa aipatzen dutelako ("sucesos" jatorrizko gazteleraz). Argudiatu dutenez, "ez da terminologia egokia zigorgabe gelditu diren bost erailketaz hitz egiteko".

Espainiako Gobernuaren konpromisoa

Sarraskiaren 49. urteurrenean Zaramagan egon da Fernando Martinez Memoria Demokratikorako Estatu idazkaria. Bertan adierazi du Espainiako Gobernuak konpromisoa hartu duela martxoaren 3an "gertatutakoa" zabaltzeko, baita "nazioarteko zirkuituetan" ere.

1937ko Gernikako bonbardaketak daukan izendapen edo maila berdina hartzen du hala martxoaren 3ko sarraskiak.

 

 

Izan zaitez ALEAkide!

ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu? Aukera ezberdinak dituzu gure proiektuarekin bat egiteko.

Informazio gehiago