26 urteko gizon bat atxilotu dute bikotekideari eraso diolakoan

Erredakzioa 2025ko mar. 3a, 12:52

Eraso matxisten aurkako elkarretaratzea, 2024ko Gasteizko jaietan. Argazkia: ALEA

Igande arratsaldean atxilotu zuen gizona Gasteizko Udaltzaingoak, bikotekidearen testigantza jaso ostean.

Genero indarkeria leporatuta 26 urteko gizon bat atxiki zuten atzo udaltzainek, larrialdi zerbitzuan jasotako dei bati erantzunez. Lakuako etxe batean eztabaida zegoela jakinarazi zieten udaltzainei, 17:00ak aldera.

Udaltzainak etxera hurbildu zirenean emakume bat topatu zuten, adin txikiko alabarekin batera, eta hark adierazi zien bikotekideak kolpatu egin zuela. Lesio zantzu ikusgarriak zituen emakumeak aurpegian eta soinean, "duela gutxi jasotako eraso" batenak izan zitezkeenak, udaltzainen arabera.

Salaketa jasota, gizona atxilotu zuten agenteek, genero indarkeria leporatuta.

Tratu txarrak pairatzen badituzu edo kasuren bat ezagutzen baduzu, deitu telefono hauetako batera: 900 840 111 (EAEn) edo 016 (Estatu osoan); doakoak dira eta ez dute arrastorik uzten fakturan, baina bai telefonoan. Beraz, ez ahaztu ezabatzea.

Izan zaitez ALEAkide!

ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu? Aukera ezberdinak dituzu gure proiektuarekin bat egiteko.

Informazio gehiago