NATOri ezezkoa emango diote berriz Gasteizen, 39 urte beranduago

Erredakzioa 2025ko mar. 3a, 11:04

Herri Batasunak NATOren aurka bozkatzera deituz egindako mobilizazioa. Argazkia: Egin

Martxoaren 12an mobilizazioa deitu du Askapenak Gasteizen eta Hego Euskal Herriko beste hiriburuetan. Gerra inperialistari gerra egiteko dei egin dute.

1986ko martxoaren 12an Hego Euskal Herriak ezetz esan zion NATOri, Felipe Gonzalezek Estatu mailan antolatutako erreferendumean. Data hori gogoan, ezezko horren espirituari berriro heltzeko dei egin du Askapena antolakunde internazionalistak, eta mobilizazioak iragarri ditu martxoaren 12rako Hego Euskal Herriko hiriburuetan.

Atzo, gaur eta beti NATOri ez! lelopean, Gasteizko mobilizazioa 19:30ean izango da Correosen plazan, hilaren 12an bertan, datorren asteazkenean. NATO antolakunde kriminala dela salatu dute, eta inperialismoaren tresna nagusia dela herriak zapaltzeko. NATOren aurkako olatua berrantolatu eta berpizteko dei egin dute.

Palestinar herriaren aurkako genozidioaren testuinguruan, eta "inperialismo atlantistak herri langileen aurka egiten duen erasoaldiaren" testuinguru orokorrean, beharrezkotzat ikusi dute "sozialdemokraziaren irtenbiderik gabeko bideen aurka" egitea. Ofentsiba inperialistari aurre egiteko antolatzera deitu dute.

Izan zaitez ALEAkide!

ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu? Aukera ezberdinak dituzu gure proiektuarekin bat egiteko.

Informazio gehiago