Joan den astean gizon bat adingabe bati sexu erasoa egiten saiatu zen Zabalganeko gizarte etxean. Gasteizko Itaiak eta Zabalgana Batuz auzo elkarteak elkarretaratzea deitu dute gertatua salatzeko, gaur arratsaldean bilduko dira Zabalganeko gizarte etxean bertan, 19:00etan.
Jakinarazi dutenez, adingabeari eraso egin zion gizona hirugarren graduan zegoen, eta aurrekari ugari ditu sexu erasoekin lotuta, bai adingabeei zein ezintasun psikikoak zituzten pertsonei egindakoak. Itaiak eta auzo elkarteak adierazi dute kezkagarria dela instituzioek neurri eraginkorrik hartu ez izana "biktimak babesteko eta egoera errepika ez dadin ziurtatzeko".
Ohartarazi dute adingabeen aurkako erasoak haien zaurgarritasun egoera probestuz egiten direla, eta are larriagoak direla izan ditzaketen ondorioak. Adierazi dute sexu eraso ororen aurka erantzutea ezinbestekoa dela, "kaleetan eraso horien aurkako gaitzespen soziala eraiki ahal izateko eta, horrela, erasotzaileen inpunitatearekin amaitzeko".
Tratu txarrak pairatzen badituzu edo kasuren bat ezagutzen baduzu, deitu telefono hauetako batera: 900 840 111 (EAEn) edo 016 (Estatu osoan); doakoak dira eta ez dute arrastorik uzten fakturan, baina bai telefonoan. Beraz, ez ahaztu ezabatzea.