Martxoak 3 elkarteak M3moria Auzolana ekimena aurkeztu du, M3arekin lotutako testigantza eta objektuen bilketa jarri dute abian, San Frantzisko Asis elizan egitekoa den Memoria Zentroa hornitzeko. Duela urtebete hitzarmena sinatu zuten Gogora institutuarekin ikerketa, dokumentazio eta hedapen lanak egiteko, eta horretan eman dute azken urtea.
2024ak 70 testigantza baino gehiago bildu dituzte 1976ko greba prozesuan parte hartu zuten pertsona ugari elkarrizketatuz. Gainera, pertsona horiek hainbat objektu eman dizkiote dohaintzan elkarteari. Hemendik aurrera objektuak jasotzen jarraitzeko, dohaintza protokolo bat ezarri dute. Martxoak 3 elkartearen egoitza berria leihatila irekia izango da testigantzak eta objektuak eramateko. Astelehenetik ostiralera egongo da zabalik, 11:30etatik 14:00etara Vicente Manterola kaleko 1. zenbakian, eta bi telefono ere eman dituzte harremanetarako, 945 777 881 eta 688 677 902.
Ez dituzte martxoaren 3ko sarraskiarekin lotutako objektuak soilik bildu nahi. Garaia azaltzen duten objektuak ere bildu nahi dituzte, garaiko bizi baldintzak eta greba prozesua irudikatzen lagunduko dutenak. "Laneko arropa, nominak, maletak, paskinak edo garai hartako dokumentuak, emakumeek erabiltzen zituzten poltsak edo egun haietan jasotako poliziaren munizioa."
Hitzordu ibiltariak egingo dituzte M3moria auzolan hau zabaltzen laguntzeko. Lehena Adurtzan izango da, martxoaren 9an. Heraclio Fournier kaleko 30.ean egongo dira 11:00etatik 13:00etara. Bestalde, ostegunean, hilaren 27an, inauguratuko dute egoitza berria, eta ekitaldian Martxoak 3 izeneko obra interpretatuko da, dantza garaikidearen bidez azaltzen duena greba prozesuan egindako azken batzarra. Beatriz Ledesma "Noralai" zuzendariak gidatuta, 19:30ean interpretatuko dute Martxoaren 3ko plazan.
Mobilizazioak astelehenean
Martxoaren 3a gogoratu eta borrokan eroritakoak omentzeko mobilizazioa iragarri dute astelehenerako. ELA, LAB, Steilas eta ESK sindikatuekin batera egin du deialdia M3 elkarteak. Martxoaren 3ko biktimen omenaldia egingo da 18:00etan monolitoan bertan, eta ondoren manifestazioa.
Urtero bezala, gaurkotasunari lotutako aldarriak izango ditu martxoaren 3ko manifestazioak, memoria ariketa bizia baita elkartetik sustatzen dutena. Aurtengo leloa Faxismoaren aurrean antolatu, eskubide sozialak borrokatu izango da. 18:30ean abiatuta, Zaramagatik Katedral Berrirainoko ibilbidea beteko dute aldarrikapenek. Katedral Berrian egin zen duela 49 urte hildakoen omenezko hileta jendetsua. Horrela "langileen borrokarekin eta 1976ko sarraskiaren zigorgabetasunaren salaketarekin lotutako bi leku elkartuko dira."