Aurreko agintaldian, Osasun sailburuak erabaki zuen Txagorritxuko ospitalean elkartzea hiriburuko larrialdi zerbitzu guztiak, eraginkorragoa zelakoan, eta itxi egin zuten Santiago ospitaleko larrialdien atala. Orain baina, Pradales lehendakariak eta Alberto Martinez Osasun sailburuak iragarri dute berriz zabalduko dutela Santiagoko larrialdi zerbitzua. Hainbat eragilek eskatua zuten berriz martxan jartzea.
Beharrezko prestaketak eginda, apirilaren 1ean sartuko da indarrean neurria, eta 24 orduz egongo da zabalik Larrialdi arreta. Sagardui sailburu ohiak argudiatua zuen bere erabakia ez zela ofizialki zerbitzuen murrizketa bat izan, zenbait larrialdi zerbitzu mantendu zituelako Santiagok, izan anbulantzian heltzen zirenak, edo beste medikuren batek bideratuta. Baina ez zegoen aukerarik larrialdi zerbitzura zuzenean joateko arreta eske. Tarte honetan ere ikusi da itxaron zerrendek eta denborek gora egin dutela, eta mobilizazio ugari egon dira erabakiaren aurka.
Alberto Martinez egungo sailburua Gasteizen izan da, San Martingo Etengabeko Arreta Gunean egin duten ekitaldi batean, eta bertan iragarri du denentzat irekiak egongo direla Santiagoko Larrialdiak, eta bi aste barru plan osatuago bat aurkeztuko dutela. San Martingo EAGaren itxierak ere antzeko bilakaera izan du. Itxi egin zuten 2019an, eta aurten zabaldu dute atzera, Osakidetzaren kalitatea hobetzeko hartutako neurrien baitan, Lehendakariaren esanetan.
Osakidetza berpizten
Sailburuak hitzeman du profesional gehiago egongo direla Santiagon lanean, baina ohartarazi du muga asko dituztela Osakidetza indartzeko. "Badugu aurrekontua baina medikuak falta zaizkigu" adierazi du. Gaineratu du EAEk ez duela eskumenik horri aurre egiteko, baina Estatu mailako neurriak galdegin ditu. Gehien nabarmendu duena izan da "hala nahi duten medikuei" uztea 72 urtera arte lanean jarraitzen.
Martinezi galdetu diote ea zein diren ezberdintasunak Sagarduiren garaiarekin alderatuta, EAJko kideak baitira biak, eta erantzun du berak "eskaeraren arabera" hartzen dituela erabakiak, eta ez irizpide politikoen arabera. Osakidetzaren egoera hobetzea izan da Lehendakaritza berriaren promesetako bat, eta sailburuak adierazi du "helburu batzuk" bete dituztela jadanik, eta haien asmoa zela agintaldiko lehen urtean gizarteak hobekuntzak nabaritu zitzala.