Gasteizko autobus geltokiak funtsezko zeregina du hiriko mugikortasunean. Hala azaldu du Beatriz Artolazabal Espazio Publikoaren eta Auzoen zinegotziak, autobus geltokiko joan-etorrien balantzea aurkeztean.
"Errekor absolutua lortu dugu, 4.127.164 bidaiarirekin; hau da, azpiegitura hori erabili dutenak 2023an baino % 24 gehiago izan dira. Beste nolabait esanda, 800.000 pertsona baino gehiagoko gorakada izan dugu."
2015ean inauguratu zenetik izandako urterik onena izan da 2024a. Pandemia garaia kenduta (1.324.000 bidaiari 2020an), gorakada jarraitua izan du geltokiak sortu zenetik, bidaiarien kopuruan zein autobusenean. Geltokiaren garrantzia egonkortu izana azpimarratu du zinegotziak.
Azken hamar urteetan bidaiari kopurua bikoiztu izanak, zinegotziaren esanetan, erakusten du herritarrek konfiantza dutela garraio publikoan, eta "eskaria gero eta handiagoa dela". 200.000 autobus inguru igaro dira geltokitik 2024an, eta Artolazabalek nabarmendu du garraio-nodo gisa finkatu dela geltokia.