Arabako irrati autogestionatuaren 42. urteari hasiera emango diote larunbat honetan, parrilla berriaren aurkezpenarekin. Hala Bedi Tabernan iragarriko dute ikasturte honetako programazioa.
Goizean hasita, 11:00etan zuzeneko emisio bat egingo dute tabernatik bertatik, eta irratsaio berrietako kideak igaroko dira bertatik, haien saioak aurkezteko. 13:00etan egingo da parrilla berriaren aurkezpena.
Programazio berria iragarri du Hala Bedik, lau irratsaio berrirekin, eta guztira 26 irratsaio propio ekoiztuko ditu irratiak. Kultura arloko sei, musikari buruzko hamabi, eta zortzi gizarte gaiei buruzkoak. Hamaika irratsaio izango dira euskaraz, eta 15 gaztelaniaz. Hala Bediren kate elebidunean, Hala Bedi 1 katean, entzun ahalko dira saio guztiak, 107.4 FMan (107.7 Arabako Errioxan) edo halabedi.eus webgunean.
Goizetan irratiaren magazinek izango dute protagonismoa. Hizpidea saioa entzungo da aste barruan, 8:00etatik 10:00etara, eta Suelta la Olla erdarazko magazina 10:00etatik 12:00etara. Aurten egongo diren irratsaio berriei buruzko informazioa ere zabaldu dute:
Arrapataka
Elkarren artean batere loturarik ez duten askotariko gaiak landuko dituzte saio honetan, dibulgazioa helburu. Uxue Perez eta Xabat Mujika lehengusuak arituko dira bertan, bitxikeria zale guztientzat.
Kafe Procope
Musika oinarri izango duen saioa, mundu honen bueltako gai anitzen inguruan "diskriminaziorik gabe solasean" aritzeko tartea izango da.
Obaba
Gaurkotasuna landuko du Obaba saioak, informazioa helburu izanik. Astero aditu berri bat izango dute, haien ikerketa esparruari buruz luze hitz egiteko. "Betiere kritikotasuna lanabes eta egia bidelagun".
Radio Rebelde
Asteko informazioaren analisia, Espainiar Estatuan zein Europa, Amerika, Asia-Pazifikoa eta Afrikako geopolitikarekin batera.