Obrak finantzatzerakoan erabilera kulturala arautuko duen klausula bat sartzeko eskatuko dio EH Bilduk Gasteizko udal gobernuari. Alderdiaren ustez, etorkizunean "bermatu" behar da finantzaketa publikoa duten espazioetako obretan egindako inbertsioa "herritarrengana itzuliko" dela erabilera kulturalaren bidez, "interes orokorreko beste alderdi batzuen artean".
Aitziber Salazar zinegotziaren arabera, erakunde publikoek inbertsioen bidez egindako "ahalegina" aintzat izanda, "ez dago lekurik inolako beto, xantaia edo zentsuratarako". Haren esanetan, inbertitutako dirua "herritarrengana" bueltatuko dela ziurtatzeko aukera bakarra "finantzaketa publikoa duten birgaitze proiektuetan klausula bat jartzea" da.
Santa Maria Katedrala jarri dute horren adibidetzat, bertan Sacamantecas pelikularen pasarte batzuk grabatzeko Gotzainak emandako hasierako debekuaren aurrean. Katedral zaharrak 50 milioi inguru euroko inbertsio publikoa jaso duela gogora ekarri du alderdiak. "Horrek are gehiago erakusten du diru publikoz birgaitutako espazioen erabilera kulturalerako etorkizuneko aukerak zehazteko beharra", argudiatu dute.