GEU Gasteiz aldizkariaren bilduma osoa digitalizatzeko hitzarmena adostuta, Sancho el Sabio Vital Fundazioak aldizkari historikoaren ale guztiak digitalizatu ditu, eta eskuragarri utzi "interesa duten ikertzaileek" ikusteko. Bihar ospatuko den euskararen egunaren baitan aurkeztu dute ekimena.
1992. urtean hasi zen GEU elkartearen proiektu komunikatiboa, Gasteizen eta Araban izandako gertaerei buruz euskaraz informazioa zabaltzen. 2009ko abenduan argitaratu zen azken alea, eta 202 aldizkari kaleratu zituzten guztira. Orain, digitalizatuta, fundazioaren gordailu digital irekian sartuko dira. Hemen lehen alea.
Aurten 60. urteurrena ospatzen ari da Sancho el Sabio Vital Fundazioa, euskal kulturaren kontserbazio eta dibulgazio lanetan aritzen dena. Euskal Memoria Digitala gordailua da bere ekimen garrantzitsuetako bat. Fundazioa, adierazi dutenez, "Gasteizi eta Arabari buruzko argitalpen irekien bilduma garrantzitsua sortzen ari da, eskuragarri ez dauden argitalpenak ezagutaraztea helburu."
Euskal kultura zabaltzeko eta aztertzeko "ezinbestekoa" da dokumentu bilduma, fundazioaren hitzetan. Euskara sustatzeko bestelako ekimenak ere egin izan ditu elkarlanean fundazioak GEU elkartearekin, Kantari edo Euskaraldia, esaterako.
