Tuvisako enpresa batzordeak deituta, kontzentrazioa egin dute goizean langileek, BEIren Boulevardeko geltokiaren aurrean. Iragan asteartean, BEIko langile batek jasan zuen erasoa salatu dute elkarretaratzean, eta "indarkeriazko jokabide horien erabateko gaitzespena" adierazi dute.
Enpresa batzordeak aurreko astean kaleratu zuen agirian eskatu dio zuzendaritzari "erasotzailearen aurka legez jarduteko, dagokion salaketa jartzeko eta, bere betebeharra den bezala, erasoa jasan duen langilearen zein udal-sozietatearen beraren interesak defendatzeko". Halaber, eraso hauek saihesteko eta babestuago egoteko, manparak jartzeko eskatu du beste behin enpresa batzordeak. "Tamalez, horrelako gertaerek agerian uzten dute erasoak saihesteko neurri eraginkorrak behar direla, hala nola, horretarako homologatutako manparak. Hori aspalditik eskatzen da, eta Tuvisak uko egiten dio horri, metakrilatoei eutsiz", esan dute iragan astean kaleratutako idazkian.