50 urte bete ditu aurten LAB sindikatuak, eta Araban hirugarren sindikatua da egun. Egindako ibilbidea gogoratzeko eta aurrera begirako erronkak finkatzeko baliatu du ospakizuna sindikatu abertzaleak, eta urte osoan zehar hainbat ekimen egin ditu LAB Zabaltzen lelopean, "nazio askapenerako eta eraldaketa sozialerako bidea zabaltzen mende erdi egin dugula gogoratu, eta, aldi berean, etorkizunera begira bide horretan jarraitzeko konpromisoa berritzeko".
Irailaren 14an, Gasteizen, egingo dute ospakizun horren baitako ekitaldi nagusia. "Arabari eta Gasteizi begirako eguna izango da, bertako borrokek LAB indartu dutelako eta, aldi berean, LABek Arabako langile klasearekiko duen konpromisoa berretsi nahi duelako. Izan ere, Araban ere sindikalismo berria indar handiz ari da zabaltzen: borrokak aktibatzen, lan eta bizi duinak defendatzen, gure balioak eta egiteko moduak hedatzen eta baita gure presentzia handitzen ere. LAB jada Arabako hirugarren sindikatua da, eta afiliazioan eta ordezkaritza mailan inoizko kopuru altuenak ditu egun".
Egun osoko egitarauaren barne honako ekitaldi hauek izango dituzte afiliatuek:
- 11:00etatik aurrera, Andre Maria Zuriaren plazan: Infogunea. Bertan, informazio sindikalaz gain, sindikatuaren oinarriak, ildoak eta proiektuak azalduko dituzte.
- 12:00etan Andre Maria Zuriaren plazatik: Aldarrikapen kalejira. Bukaeran ekitaldi txiki bat egongo da plazan.
- 14:30ean Sumendin: Bazkari herrikoia. Bukaeran, bazkaloste musikatua izango da, Gorka Etxeberria abeslariaren eskutik.
- 20:00etatik aurrera Garraxi tabernan DJak egongo dira.