Parasite kolektiboak eta Baratza aretoak Ikerketa eta Sorkuntza Eszenikorako Laborategia antolatu dute, 2024-25 ikasturtean zehar artisten entrenamendu gune izateko. Hamargarren urtez ari dira eskaintzen ikastaroa, eta 120 pertsona inguru igaro dira bertatik jada, askok gerora beren konpainiak sortu dituztenak eta arte eszenikoetan aktiboki jarduten dutenak.
Ikasturte osoan zehar bi ardatz landuko dituzte, gorputz entrenamendua eta ikerketa eszenikoa, batetik, eta sormena lantzeko tailerrak, bestetik. Jadanik sorkuntzan diharduten pertsonentzako pentsatua dago laborategia, eta onarrizko prestakuntza eskatzen dute parte hartzeko baldintza gisa, izan eszena, arte edo gorputz diziplinaren batean. Ikuspegi profesionala du, izan ere, laborategiak.
Horregatik, ikastaro osoan zehar astean behin klaseetara joateko konpromisoa hartu behar dute parte-hartzaileek. Goizez izango dira klaseak, astearte eta ostegunetan, 10:00etatik 13:00etara, eta asteazken eta ostiraletan banakako lanetarako denbora izango dute artistek. Hilean 100 euroko ekarpena eskatzen dute antolatzaileek, eta irailaren 30a arte egongo da zabalik izen emateko epea, parasitekolektiboa@gmail.com helbidera idatzita. Bertan egiten duten lana ezagutzeko, ate irekien jardunaldiak antolatu dituzte irailaren 24 eta 26an.
Aholkularitza profesionala
Arte eszenikoen prestaketaz gain, ikastaroan zehar aholkularitza zerbitzu bat egongo da artisten esku, eta bertan lagunduko diete elkarteak eta konpainiak sortzen, autonomo egiten eta deialdiak edo dirulaguntzak betetzen. Sortutako lanak saltzen eta banatzen ere erakutsiko diete.