Sabin Salaberri Urzelai musika konpositore, zuzendari, irakasle eta ikertzaileak 90 urte bete dituela eta, margolaritzako eta argazkigintzako artista talde batek Koloredun notak izeneko pintura eta argazki erakusketa sortu du, eta Ignacio Aldecoa Kultura Etxean egongo da ikusgai urriaren 2ra arte. Blanca Abajo Alda, Karol Fernandez Arberas, Amaya Camoeiras, Marijo Lojo Escalante, Ana Diaz de Espada, Zirika eta Susana Camoeiras dira erakusketa osatu duten artistak.
Lehen aldiz jendaurrean aurkezten dituzten hogei bat lan bildu dituzte erakusketan, konpositorearen figuran eta musikan oinarrituak. Erakusketaren bidez, Salaberriren figura omendu nahi da, bai eta euskal kulturari egin dion musika eta konposizio ekarpena ere. Abuztuaren 20an bete zituen Salaberrik laurogeita hamar urte, eta egun horretan bertan inauguratu zuten erakusketa.
Sabin Salaberri
Aramaion jaio zen Salaberri musika konpositorea, zuzendaria, irakaslea eta ikertzailea. Konpositore gisa egin duen ekoizpen gehiena musika koralari dedikatu dio, baina beste eremu batzuk ere landu ditu, hala nola ahotserako eta pianorako abestiak zein ahotserako eta orkestrarako abestiak, bai eta organorako musika ere. Alde horretatik, eginkizun garrantzitsua izan zuen euskarazko lehen errepertorio liturgikoen osaeran.