Andre Maria Zuriaren plazako monumentu nagusiaren egungo egoera jakiteko, Gasteizko Udalak azterketa zientifiko bat jarri du abian. Petra enpresa esleipendunak egiaztapenak egingo ditu monumentuan bihar arte, eta azterketarako beharrezkoak diren laginak hartuko ditu. Bigarren fasean, laginak laborategira eramango dira aztertzeko, eta bulegoko lana egingo du enpresak. Guztira, analisiak 18.030 euroko kostua izango du, eta bost egun inguru iraungo du.
Azterketa honek monumentuaren kontserbazio eta zaharberritze zientifiko integralerako proposamena egiten lagunduko duela adierazi du Sonia Diaz de Corcuera Kultura zinegotziak. Enpresa, Gasteizko Udaleko teknikak eta Arabako Foru Aldundiko Zaharberritze Zerbitzuko Zuzendaritza Teknikoa elkarlanean arituko dira ahalik eta informazio gehien ateratzeko helburuarekin, udalak adierazi duenaren arabera. Halaber, mantentze plan bat martxan jarriko duela jakinarazi du, monumentua zaharberritu ondoren.