Abuztuaren 5eko eguerdian, Gasteizko jaien harira Foru plazan antolatutako herri kirol erakustaldian, Eider Garcia Duranak errekor berri bat lortu zuen. Bost aldiz jaso zuen 100 kiloko kopa, zilindro formako harria, hiru minutuko txanda ofizialean. Epaileek egiaztatu zuten balentria, eta hala, lehen emakume arabarra izan da 100 kiloko kopa altxatzen.
Garcia Duranak berak martxoan beste mugarri bat gainditu zuen, Euskal Telebista Publikoko Harri Herri txapelketan. 100 kiloko harri errektangularra altxatu zuen, eta ordura arte emakume arabarrek ez zuten inoiz hainbeste pisu jaso. Bi harri mota ezberdinekin 100 kilo atxatzen ere lehena izan da.
Eider Garcia Duranak 29 urte ditu, urte eta erdi eskas darama harriak jasotzen, eta hainbat errekor lortu ditu jadanik emakume arabarrentzat. Aipatutakoez gain, 2023ko urrian 75 kiloko bola jasotzea ere lortu zuen Izarran, lehen emakume arabarra izanik halako bat jasotzen.
Ibon Murgak, harri jasotzaile ohi eta Eider Garciaren entrenatzaileak, adierazi du Bizkaia eta Gipuzkoako emakumeek aurreko urteetan hautsi dituztela marka hauek, baina Arabako harri jasotzaileen historian mugarri izan dela aste honetako lorpena. Murgak azaldu du Araban historikoki jende gutxiago aritu dela harri jasotzen, emakume zein gizonak, eta horregatik joan izan direla "pixkat atzetik" markak hausteko orduan.
Beste marka bat ere hautsi dute Arabako emakume harri jasotzaileek. Lehen aldiz parte hartuko dute arabarrek Euskadiko txapelketan. Bestalde, Arabako Emakumezkoen lehen Txapelketa ere ospatuko da aurten, irailaren 6an Eltziegon.
