Udaltzaingoak 52 urteko gizonezko bat atxilotu du asteazken gauerdian, bikotekideari eraso fisikoa egitea egotzita. Gertakariak 00:30ak pasatxo zirenean jazo dira, Arana auzoko bizilagun batek poliziaren patruila bati bere leihotik deitu dionean. Lekukoak ohartarazi duenez, bere etxearen aurrean gizon bat ikusi du, emakume bati eraso egiten.
Udaltzainak bi aldeekin bildu dira gertatutakoa argitzeko, eta behin azalpen guztiak entzunda, eta biktimak zituen lesioak ikusita, ustezko erasotzailea atxilotu dute.
Tratu txarrak pairatzen badituzu edo kasuren bat ezagutzen baduzu, deitu telefono hauetako batera: 900 840 111 (EAEn) edo 016 (Estatu osoan); doakoak dira eta ez dute arrastorik uzten fakturan, baina bai telefonoan. Beraz, ez ahaztu ezabatzea.