Larunbatean, ekainaren 8an, lehen aldiz ate irekien jardunaldia egingo dute Santsomendiko Guardia Zibilaren kuartelean. Marisol Garmendia EAEko espainiar gobernuaren ordezkariak adierazi du Guardia Zibila "gizarteari hurbiltzea" dela ekimenaren helburua, eta "normaltasun osoz" hartu behar dela. Bizi dugun normaltasun zibiko eta demokratikoaren erakusle dela gehitu du.
Bi orduz Guardia Zibilaren jarduera esparru ezberdinak ezagutu ahal izango dituzte hurbiltzen direnek, eta "ekintza interaktiboak" ere egongo direla iragarri dute. Halako ekimenak ohikoak omen dira espainiar estatuko beste zonalde batzuetan, Guardia Zibilak dioenez, eta "Euskadin ere normaltasuna lortzea" da indar armatuen asmoa. Espainiako gobernuaren ordezkaritzak zabaldutako ohar batean esan dute helburua dela "gazte zein helduek lehen eskutik" ezagutzea Guardia Zibilaren espezialitateak.
Txikienentzako jarduerak ere egongo dira larunbatean. Haurrak igoko dituzte Guardia Zibilaren trafikoko motorretan eta GEAS unitateen uretako motorretan. Beste hainbat gailu ere erakutsiko dituzte, txikienei zuzenduta, Pegaso unitatearen dronea, adibidez. Amaitzeko, trebatutako txakurren erakusketa egingo dute.
Azken hilabeteetan gehiago ateratzen hasi dira Santsomendiko guardia zibilak. Maiatzaren 14an, lehen aldiz, desfile militarra egin zuten kuarteletik kanpo, Santsomendiko kaleetan, ospatzeko Espainiako erakunde armatuak 180. urte bete zituela. Santsomendi da Gasteizen Vox alderdi ultraeskuindarrak boto gehien ateratzen dituen auzoa.