Araba ez dago salgai! Hala oihukatu zuten ehunka pertsonek larunbat eguerdian Gasteizen, lurraldean eraiki edo proposatu diren "proiektu energetikoen mehatxuaren aurrean". Nekazarien traktoreek bidea irekita, Gasteizko kaleetatik aldarrikatu zuten trantsizio energetikoa iruzurra izango dela, "natura eta landa inguruneetako bizitza ezabatzea badakar".
Enpresen interesen arabera egin dira proiektu fotovoltaiko eta eolikoak Araban, antolatzaileen esanetan. Plangintzarik ez izatea egotzi diete agintariei, eta manifestazioan eskatu dute abian dauden proiektuak geldiarazteko, lehen sektorea eta ingurumena babestuko dituen plan orokor bat izan artean.
