Asteburu honetan ospatuko dira Errekaleor Auzo Askeko jaiak. Urtero bezala, maiatzeko azken astebururako egitaraua aurkeztu dute. Ostiralean 19:00etan izango da jaiei hasiera emango dien txupinazoa, eta igande iluntzean amaituko da egitaraua, Herri Gimnasioan kirol proba ezberdinak egin ostean. Iaz ospatu zuten X. urteurrena Zuen atzaparretatik at! leloarekin, eta aurten ere Errekaleor Bizirik dagoela aldarrikatu nahi izan dute jaiak antolatzerako orduan.
Ostiralean, txupinazoaren ondoren, Afro beat doinuek beteko dute Errekaleor, Gasteizko Karabankunda taldearen eskutik. Iluntzean, 22:00etatik aurrera, kontzertuak izango dira. Zinkha, Broken Salad, Txerri Ugerrak eta Dj 1.3 taldeen emanaldiez gozatzeko aukera egongo da auzoan. Bertan afaltzeko aukera ere izango dela jakinarazi dute Errekaleor Bizirik kolektibotik, bai ostiralean eta baita larunbat gauean ere.
Larunbaterako berriz egun osoko egitaraua antolatu dute. Goizean goiz hasiko dira, 9:30ean, Iker Arkaiari egingo dioten omenaldiarekin. Udazkenean hil zen Errekaleorri "urteetako laguntza" emandako kidea, eta hura oroitzen hasiko dute eguna. Arkaiaren omenaldia Gasteizko beste hainbat eragilerekin batera antolatu dute errekaleortarrek, eta ekimen paraleloak egongo dira egun osoan zehar Gasteizen, Sumendi espazioan eta Orbain kultur elkartean, esaterako. Errekaleorren, baina, goizeko egitarauarekin jarraituko dute, txikienentzat antolatutako ekimenekin. Arai konpartsaren buruhandiak eta erraldoiak ibiliko dira auzotik, eta Pontx pailazoaren ikuskizuna ere bai.
Eguerdian herri bazkaria antolatu dute, eta bertaratzeko gonbita egin dute antolakuntzatik. Ez dago sarrera erosi beharrik, azaldu dutenez, bertan antolatuko baita dena. 17:00etatik aurrera artisau azoka zabalik egongo da Errekaleorreko pasealekuan, eta inguruko artisauei dei egin diete, postu bat jarri nahi badute, mezu bat idazteko errekazoka24@proton.me helbidera.
Arratsaldean eta iluntzean musikak izango du berriz ere protagonismoa jaietan. 17:30etan elektrotxarangak izango dira nagusi, Lasarte Oriako Elektropottotte taldea eta Gasteizko Dirty Dürüm Brass Band ibiliko dira auzotik bueltaka. 22:00etan, berriz, kontzertuen txanda izango da. Larunbatean Attürri, Ziztada eta Rlantz, Neskatasuna eta Dj Azkura izango dira oholtza gainean.
Igande goizean ondo deskantsatu ostean, kirolari ekingo diote arratsaldean. 17:00etan hasita, Herri Gimnasioan, Errekaleorreko frontoian, ekimen ugari antolatu dituzte. Roller Derby, Ranpball eta kutxen erronkan parte hartzeko aukera izango dute gerturatzen direnek.