Eragiteko janzten

"Euskara erdigunera ekarri behar dugu; besteak beste, enpresei motibazio ekonomikoak jartzen"

Erredakzioa 2024ko mai. 12a, 20:45

Iraitz Perez de Goldarazena Oreka IT aholkularitza informatikoko zuzendari nagusiak enpresan euskararen erabilera kudeatzeko duten ereduari buruzko azalpenak eman dizkigu Eragiteko Janzten zikloaren baitan.

Aurreko urteetako hitzaldi saioak alde batera utzi eta arlo digitalean jarri nahi izan ditu indarrak Eragiteko Janzten zikloak. Modu honetan, publiko berrietara iritsi nahi dute, Euskaltzaleen Topaguneak, GEU eta Lazarraga elkarteek eta ALEAk. Helburu nagusia ez da aldatu: Gasteizko eta Arabako euskaltzaleen "elkar ezagutza areagotzea", bide horretan "sinergia eta elkarlan eraginkorrerako aukerak zabaltzeko". Horrekin batera, euskararen normalizazioan egiten duten eragileen lana jaso, ikusarazi eta komunikatu nahi dute, baita ohikoa ez den "publiko zabalago batera" iritsi ere, euskalgintza gertutik bizi ez duten herritarrengana formatu "arin eta freskoagoen bidez" heldu asmoz.

Arlo ezberdinetan jarduten duten eragileetako ordezkariek parte hartuko dute bideoetan, bi eragileren arteko elkarrizketa arinekin. Gasteizen eragile asko daudela aintzat izanda, antolatzaileek laginketa bat egin behar izan dute, euskararen inguruan ahalik eta ikuspegi zabalena jasotzeko. Edizio honetan parte hartuko dutenak hauek izango dira: AEK, Oreka IT, Bai Euskarari, Zabalgana Euskara Taldea (ZET), Gasteizko euskara zerbitzua, GEU elkartea, Txagorritxuko ZIZTA euskara taldea, Aldaiaberri Guraso Elkartea, Gaztedi Rugby Taldea eta Lazarraga kultur elkartea.

 

ALBISTEAK MUGIKORREAN

ALEAren albisteak Whatsapp edo Telegram bidez jaso nahi dituzu?

WHATSAPP: Bidali ALEA hitza 645 66 86 02 telefono zenbakira.

TELEGRAM: Batu zaitez @ArabakoALEA kanalera.


ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide