Gasteizko Olarizuko osasun etxean pediatria zerbitzua mantenduko duten zalantza agertu du Adurtzako auzo elkarteak. Izan ere, iragan astean jakin zuten osasun zentroan ez dutela maiatzerako pediatria hitzordurik ematen, "arratsaldeko txandan behintzat".
Gaur dagoen pediatrak alde egingo duela jakin izan dute bizilagunek, eta oraindik ez dakite ordezkorik izango den zerbitzua emateko. "Familiek pediatria zerbitzua beste osasun zentro batzuetan jaso behar izatea ere gerta litekeela esan digute". Egoera ikusirik, idazkiak bidaltzen ari dira Osakidetzara, eskatzeko behar diren baliabide guztiak jar ditzala hiriko hegoaldeko auzoetako umeentzako pediatria zerbitzua bermatzeko.
Bizilagunek azaldu dutenez, Olarizuko osasun zentroak oso eremu zabal bateko haurrei ematen die arreta, eta batzuentzat –Goikolarrako familientzat, batez ere– Olarizuko zentroa bera etxetik urrun samar dago. Beraz, "urrutiago dagoen zentro batera joan behar izatea arazo handia izan daiteke familientzat".