Vocento taldeak argitaratu duenez, Miranda Ebroko 29 urteko gazte bat hil zen joan den ostiralean, martxoaren 15ean, 03:15ak aldera gertatutako trafiko istripu baten ondorioz. Egoera kritikoan eraman zuten Txagorritxu Ospitalera, eta bertan hil egin zen.
Antza denez, auto batek eta furgoneta batek talka egin zuten A-1 errepidearen 324. kilometroan, Ribabellosa (Erriberabeitia, Añana - Araba) kontzejuaren parean. Gaztela eta Leongo 112 zerbitzuak jaso zuen istripuaren berri, eta berehala Arabako Larrialdi Zerbitzuei jakinarazi zien.
Istripuaren ondorioz, beste ibilgailuko gidariak zauri arinak jasan zituen, eta Miranda Ebroko Santiago Apostoluaren Ospitalera eraman zuten anbulantzian. Une honetan, istripuaren arrazoiak ikertzen ari dira.