Gau liskartsua izan da larunbat honetakoa Gasteizen. 05:00ak aldera, Ertzaintzak 32 urteko gizonezko bat atxilotu du, diskoteka baten barruan beste pertsona bati labankada bat emateagatik. Segurtasun Sailak zabaldutako oharrean ez dago gaueko aisialdi lokalaren inguruko xehetasunik.
Biktimak zauri ebakorra zuen sabelaldean, eta anbulantzia batean eraman behar izan dute Txagorritxu Ospitalera, osasun laguntza emateko eta zauriak tratatzeko. Une honetan, bertan jarraitzen du.
Ertzaintzaren patruilek iritsi bezain pronto identifikatu dute ustezko erasotzailea, eta ustez beste pertsona zauritzeko erabili duen labana atzeman diote. Homizidio saiakera delitu bat egotzi diote atxilotuari. Ertzaintzak ikerketa bat abiatu du, eta polizia-eginbideak amaituta, Gasteizko Guardiako Epaitegiaren esku utziko dute gizonezkoa.