Gasteizko GEU elkarteak koordinatzaile izateko lan eskaintza publikatu du. Gaur egun kulturan, aisian eta mintza praktikan aritzeko hainbat programa eta ekintza eramaten ditu aurrera, eta horiek koordinatuko dituen pertsonaren bila ari dira.
Administrazio publiko ezberdinekin harremana, zein bestelako eragile eta agenteekin elkarlana da lanerako oinarrietako bat, azaldu dutenez. "Finantzazio iturriak bideratzeaz, diru-laguntzak eta zuriketak aurkezteaz zein elkarteko administrazio kudeaketa egunera eramateaz arduratuko da postua betetzen duen lankidea. Horrez gain, lan taldeko barne funtzionamendua koordinatu eta kanpo ordezkaritza egin beharko du. Gasteizen egonkortuta dagoen proiektu kultural, anitz eta euskaltzale baten alde lan egiteko aukera eskaintzen da".
Lanpostuaren zereginen artean daude, besteak beste, Gasteizko euskalgintza eta gizartean eragiten duen elkarte baten koordinazioa aurrera eramatea, administrazio eta beste erakundeetan elkartearen ordezkaria izatea, lan-taldearen giza baliabideen ardura eramatea, eta altxortegiaren kudeaketa eta erlazionatutako zereginak burutzea.
Interesa dutenek atari honetan dituzte zeregin eta baldintza guztiak.