Palestinari buruz hitz egiteari ez uztea. Herri palestinarrak egindako eskaerari erantzunez, Euskal Herrian berriz ere kalera atera da Israelgo Estatuaren aurkako Boikot, Desinbertsio eta Zigorren (BDZ) aldeko mugimendua, Espainiako zein Frantziako estatuei eta EAEko zein Nafarroako erakundeei "Gazako genozidioa gelditzeko neurri zehatz eta eraginkorrak" har ditzaten exijitzeko, bai eta "Palestinako okupazioa, apartheida eta kolonialismoaren" aurka ere.
Igande honetan, otsailaren 25ean, mobilizazio eguna antolatu eta manifestazioak egin dituzte Gasteizen, Iruñean, Bilbon eta Donostian. Azken protesta horietan, sionismoarekiko harreman diplomatikoak, instituzionalak, ekonomikoak, kirolekoak eta kulturalak etetea exijitu dute, bai eta armen zein teknologia militarraren merkataritza amaitzea ere.
Arabako hiriburuaren kasuan, besteak beste, tokiko erakundeen, Eusko Jaurlaritzaren, Espainiako Gobernuaren, CAF enpresa gipuzkoarraren —Jerusalemgo tranbia eraikitzen ari dena, tartean Palestinako lurraldean dauden legez kanpoko kolonia israeldarretan— eta Carrefour supermerkatuen katearen —Zisjordaniako okupazioan parte hartzen duten konpainiekin harremanak dituena— "konplizitatea" salatu dute.
"Gora Herri palestinarraren erresistentzia" oihuak Olagibel kalean. pic.twitter.com/L1EnBR2N5Z
— BDZ Araba (@BDZAraba) February 25, 2024
Alava Generalaren kaleko Carrefour supermerkatu parean orain. Multinazional frantsesak Israel egiten ari den genozidioaren laguntzailea dela salatuz. "Israel hiltzaile, Carrefour laguntzaile!" oihuak. pic.twitter.com/hUgENNEFqU
— BDZ Araba (@BDZAraba) February 25, 2024
Legebiltzarraren aurrean orain, CAF enpresa gipuzkoarrak Palestinako lurralde okupatuetan eraikitzen ari den azpiegitura salatuz. pic.twitter.com/CKP0Y1JJQH
— BDZ Araba (@BDZAraba) February 25, 2024
"CAF jeitsi zaitez Israelen apartheidaren trenetik." pic.twitter.com/jHKvTcUR2R
— BDZ Araba (@BDZAraba) February 25, 2024
Hildako 30.000 palestinar baino gehiago
"Azken egunetan, Israelgo Gobernuak dei egin dio Gazako populazioari Rafah husteko. Dei hori Israelen asmoen erakusgarri nabarmena da: ez dira geldituko Gazako azken txokoa suntsitu eta gazatar guztiak desagerrarazi arte", ohartarazi dute. "Israel iragan urriaren 7tik ari de nahita eta modu sistematikoan Gazako zerrenda bonbardatzen, eta dagoeneko 30.000 palestinarretik gora erail dituzte; 14.000 inguru adin txikikoak. Gainera, funtsezko azpiegiturak ere birrindu dituzte, hala nola ospitaleak, eskolak zein ur eta energia hornikuntzak; eta bi milioi pertsonatik gora kanporatu dituzte euren bizitokietatik".
"Era berean, Zisjordanian eta Jerusalemen garbiketa etnikoaren prozesua azkartzen ari da, atxiloketa masiboen, hilketen eta erasoen kanpainekin, bertako biztanleak beren lurraldetik kanporatzeko helburuarekin", gaineratu dute. "Horregatik, orain, inoiz baino gehiago, bada garaia Espainiako eta Frantziako estatuek zein EAEko eta Nafarroako erakundeek ekin diezaioten, Hego Afrikako salaketarekin bat egin dezaten eta zigorrak ezar diezazkioten Israeli".