2023ko abenduan, Elgoibarren aurkeztu zuten Bizipoza Eskola, "Euskal Herria inklusioan zipriztintzeko" helburua duen egitasmoa. Azken asteetan, hezkuntza arautuan, ez-arautuan zein herrigintzan kultur aniztasuna, familia aniztasuna, gaixotasunak, heriotza eta aniztasun funtzionala bezalako gaiak "erdigunera ekarri eta bizipozez lantzeko" material sorta prestatu eta zabaldu dute bizipozaeskola.eus webgunearen bidez: gida didaktikoak, material osagarriak, egutegia, ikus-entzunezkoak...
Orain, "balioak zabaltzen eta Euskal Herria zipriztintzen jarraitzeko" asmoz, herriz herriko aurkezpenak egiten hasi dira. Besteak beste, asteazken honetan, otsailaren 21ean, Gasteizen egingo dute aurkezpen ekitaldia, 18:00etatik aurrera Montehermoso Jauregian.
Bertan, mahai-inguru batean parte hartuko dute Naizen Adingabe Transexualen Familien Elkarteak, Sanfilippo elkarteak eta Bizipoza Eskolako froga pilotuetan parte hartu duen AEKk. Horrez gain, bi gonbidatu berezi izango dira ekitaldian: Kai Nakai abeslaria eta Ekaitz Samaniego bertsolaria.
